昔日東方政情：陸續鬆綁露營照禁 議員：市民苦等
公眾燒烤場雖因防疫措施有所放寬而重開，但政府轄下嘅露營地點則依然關閉。環境及生態局局長謝展寰尋日回應議員質詢，指開放營地需視乎情況，目前仍要「穩紮穩打」，又話本年頭3季漁護署就違規露營所發嘅警告及檢控數字分別為146及182宗。議員陳恒鑌就認為數字反映市民對兩年多嘅封閉露營場地已經等無可等，又質疑政府容許更高風險嘅活動如燒烤同7人欖球賽，繼續封閉營地並唔合理。
非法露營數字大升
喺會後，陳恒鑌指非法露營數字節節上升，但政府欠缺深入評估、故步自封，妨礙市民趁秋季天氣享受露營樂趣；陳又提到政府關閉露營場地就應該趁機進行提升，事關公眾營地不足、容量有限，易惹起露營人士爭執；至於私人營地就礙於僵化嘅政策，譬如露營車要有賓館牌照，但賓館牌照又難以申請。
議員謝偉銓同嚴剛都關注違規發展嘅私人營地。謝展寰就話政府不同部門都會對私人營地進行監察，如食環署會關注非法棄置垃圾、牌照事務處會關注經營者執照，喺海岸保護區設立露營場所必須獲得城規規劃許可。謝又指2021年財政預算案中預留5億元，喺部分郊野公園進行優化設施工程，目前喺西貢黃石、流水響、荃錦等營地進行各項優化措施，以及對郊野公園設置升級露營地點進行可行性研究。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
