昔日東方政情：中大換校徽招怨 教局回覆遊花園
監管失效無眼睇 議員擬提修例
中文大學校長段崇智續任及推出「簡化版」校徽一事，引起滿城風雨。就備受關注嘅大學管治及決策，議員梁美芬尋日向官員提出質詢，然而教育局局長蔡若蓮嘅回應，梁感到十分不滿，形容對方「答咗等於冇答，帶我哋遊花園」！至於由梁擔任主席嘅教育事務委員會，最快將於下月加插大學管治議程，邀請中大校長等相關人士出席，以解釋為何中大校董會出現監督失效嘅情況。
梁美芬指教育局今年6月曾公開各大學校董會成員比例，中大校外成員較其他大學都要低，只得17%。而大學校董會用於監管大學，早前3位身兼中大校董嘅議員要求開會但不得要領，質疑引致校長續聘及校徽爭議，當使用龐大公帑嘅大學發生監管失效，追問教育局會否主動提出修改有關條例。
蔡若蓮：大學獨立自主
蔡若蓮回應話，大學係按照法例成立嘅獨立自主機構，喺校政、選任、教學、研究及調配內部資源方面都有自主權，亦須為此負責。而校董會組成係根據各大學獨有嘅歷史、發展歷程等，組成架構有所不同。因每間大學都有各自嘅主管條例所約束，若要更改校董會成員組成，須就主管條例規程完成檢討，運用有關嘅諮詢程序透過議員喺議會提出私人條例草案形式，經議會討論同通過方可生效。
蔡又指過往亦有大學引進校外成員而有不同意見，檢討後因應建議修訂成員組成，包括精簡人數，但強調社會各持份者與大學坦誠溝通，大家得出共識最為有利。局方亦會密切留意各間大學嘅管治架構以及管治效能有否問題，明白社會人士有不同建議，要求大學運作要透明並向公眾負責。
會後，梁批評政府回答猶如遊花園，指自己支持議員提出私人草案修訂，至於教育事務委員會，最快喺下個月加插大學管治議程，邀請中大校長等相關人士出席，解釋為何中大校董會出現監管失效嘅情況。
中大校董、議員張宇人追問社會持份者對大學有意見要點溝通？蔡話大學與持份者嘅溝通可經校董會討論，大學本身亦有不同渠道聆聽市民意見，形容「唔會聽唔到」。有需要時政府亦會協助大學與社會溝通。
議員陳穎欣則質問段崇智獲得續任前，政府是否知情，嘲笑段崇智曾形容自己個任期要捱埋落去，又指段年薪係630萬元，真係難為佢，又難為我哋。蔡就指陳所關注嘅事屬大學自主範圍，強調遴選有其內部機制，政府唔會參與亦唔會干預；而校董會校內外委員比例同校長聘任，兩者冇因果關係。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
