政情：石蔭路鼠患嚴重 高官落區被嘲諷

石蔭路二號同四號休憩公園淪為老鼠樂園被踢爆後，距今半個月有多。話說區議員劉貴梅尋日喺社交平台貼文，話佢同林紹輝到石蔭路一帶視察，期間突然喺石蔭路二號休憩公園，偶遇環境及生態局副局長黃淑嫻同政治助理李世隆，李係前石蔭區議員。劉貴梅喺貼文中話因為近日媒體報道伯伯餵老鼠問題，先令過去被冷待多時嘅石蔭路鼠患問題，終於獲得官員關注。

可能心中有氣，劉貴梅都寫咗話「官員突然落區扮關心」。雖則係咁，但佢哋都當面向班官反映咗社區各項問題，希望官員能夠切實處理石蔭路一帶嘅鼠患、環境衞生同非法擺賣等問題。