昔日東方政情：百萬業主地契快到期 發展局精簡手續處理
唔少市民都想快啲「上車」，而樓係重要資產，而逾130萬業主都面對同一個問題，就係好擔心2025年地契到期嘅時候，政府會點安排？究竟地契續期，市民又使唔使補番地價呢？地產及建造界議員龍漢標早前追問過政府，到底政府點回應呢？
龍漢標尋日喺社交平台貼文，話香港嘅土地業權，絕大多數係「土地租借權」，大部分市民住嘅私人樓宇，都係屬於「土地租借權」類別，當中有唔少地契將會喺2025年到期。佢話香港有逾130萬名自置物業嘅業主，呢群業主係咪能夠順利將地契續期、係咪需要補地價，都會影響物業價值同投資者信心。
佢又舉例，話當年港島薄扶林花園逾千戶業主，為咗應付地契到期嘅法律問題，需要花錢、花精力更新地契；而未完成按揭嘅業主，更要處理銀行更新按揭文書嘅要求，仲話難怪近年唔少業主擔心，政府係咪能夠按時同合理地處理數以萬計同時到期地契嘅續期手續。
老實講，樓價一直係市民關心嘅焦點，而最近幾次加息更令唔少正在供樓嘅市民開始有顧慮。佢話見到好多家庭仍在努力供樓，為嘅就係確保早日有個固定居所，無後顧之憂，但當佢想起地契續期嘅問題，於是就去追問政府。
料毋須補地價
佢話喺政府發表《施政報告》之後，直接追問發展局局長甯漢豪，點樣精簡地契續期安排？例如業主係咪要補地價，抑或繼續以地租形式每年繳納租金。大家估吓得到乜嘢答案？佢引述甯漢豪強調政府政策冇改變，仲準備喺明年提交法案精簡續期流程添！
聽到政府咁講，龍漢標梗係好開心喇，事關續期免補地價、立法免簽契約，可釋除業主同投資者疑慮，保障市民嘅資產，佢仲話會繼續向政府跟進有關立法嘅時間表。
唔單止有關地契續約，佢早前亦曾追問有關樓市「辣招」嘅事宜，佢話辣招只係初期有助壓抑樓價，但好快就不跌反升，唔單止咁，仲打殘咗二手樓市場，佢早前已經開晒口，呼籲政府要檢討不合時宜嘅辣招，即係要撤辣，但係政府就話要睇好多方面嘅嘢，暫時無打算作出改變。雖則政府唔肯鬆綁，相信佢仍會繼續向政府提出相關要求。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
