政情：討論加薪司法未改革 議員促法官除假髮

香港回歸都25年，唔少市民認為要洗走殖民色彩，但依家香港嘅區域法院法官、高等法院法官仲要戴上假髮，近年社會上有聲音認為呢個係「戀殖」，而本身係律師嘅議員何君堯一直主張法官除假髮。而喺過去多年，唔少法律界人士都要求加快去殖化，例如要求盡快將本地法律殘留有關「女皇陛下」同「國務大臣」等殖民地字眼刪除，甚至要求律政司落實本地法律「去殖民化」嘅計劃進度同具體時間表等等。

但係講咗咁耐，司法機構依然故我。何君堯喺尋日相關嘅會議上亦再出聲批評，話司法人員要講「現代化」，尤其是係衣着打扮，佢話唔明點解法官仲要笠頂假髮囉！但係在場冇人回應佢呢條問題。

何君堯仲話喺加薪後，司法人員都要「交功課」，因為依家香港嘅商業案件排期要排到後年10月，不單止削弱香港嘅競爭力，仲好正氣咁話「拖延公義就係剝奪公義」。佢又話司法人員青黃不接，所以加完薪，就要加快案件處理速度、要吸引多啲人才。之不過，委員會主席廖長江話就算法官加薪都未必夠出面嘅私人律師搵咁多錢，所以好多人都係靠使命感做嘢。

在場都有好多律師話要諗計仔吸引人才加入司法體系，資深大律師毛樂禮就話高等法院原訟庭嘅在職法官人數只有25個，湯文龍律師都話如果人唔夠，唔可以及時解決爭議，就會影響香港嘅營商環境，令香港競爭力落後其他亞太地區，所以政府應該除咗研究司法人員薪酬之外，要多從吸引人才嘅角度去諗諗。

身兼大律師嘅議員容海恩都話政府要多啲同律師聯絡，了解律師嘅需求，又話司法機構要公開「食檸檬」嘅次數，睇睇一年之內向律師發過幾多次邀請函，會唔會增加人手畀法官做研究同草擬文件。行政署署長盧世雄就話政府會優先配合司法機構需要，希望可以吸引更多人才。