日日斬人鑊鑊甘 治安敗壞太不堪

呢嗱！早排喺元朗八鄉先有一單閘車斬人案，過咗都未夠一個月，尋日又發生一單行兇手法一模一樣嘅案件！話說一名陳姓男子尋日凌晨揸車前往大旗嶺一個燒烤場，準備同朋友見面，點知途中畀3輛私家車前後夾擊閘停，之後仲有7至8名大漢衝落車，先打爆陳男座駕嘅車窗，再揮刀圍斬陳男！呢班大漢得逞之後逃去無蹤，事發地點喺荒山野嶺，陳男惟有負傷前往燒烤場，再致電朋友求救，隨後喺朋友陪同下，前往博愛醫院求診；好彩嘅係雖然身中5刀，但陳男冇生命危險，並無搞出人命！

雖則話傷者有黑社會背景，生活喺刀光劍影之下，唔係斬人就係畀人斬；之但係，消息指陳男駕駛嘅白色私家車，原來係問朋友借用，登記車主都有黑底，懷疑班刀手係認車斬人，陳男只係被「點錯相」；警方仲相信今次案件同之前嘅八鄉斬人案有關，話唔定係報復尋仇！

話明係黑社會，大家都唔好期待啲刀手有幾專業，今日就話認車唔認人，結果斬錯人啫，點知聽日會唔會連車都認錯埋，斬錯無辜市民㗎！最緊要係，假如今次案件同八鄉斬人案有關，咁上次案件發生後，當局唔係應該拉晒涉事雙方，點解可以任由雙方繼續仇殺，仲有王法？事實上，本港黑社會愈嚟愈囂張，目無法紀，根本原因係執法部門反黑不力，愈反愈黑，甚至有「保護傘」包庇，先搞到家吓嘅局面！喺黑暴鳥獸散之後，黑幫已經成為香港治安最大毒瘤，點可以唔重視呢！

人哋就好事成雙，偏偏香港就係壞事打孖嚟！同樣喺尋日凌晨，屯門一名男子喺蝴蝶灣沙灘停車，準備去廁所嘅時候，畀8名兇徒襲擊，其中兩名兇徒仲揮舞牛肉刀指嚇，逞兇後逃去！傷者事後自行求診，結果因為屯門醫院大排長龍，輾轉去到明愛醫院先睇到醫生同報案，認真諷刺，好在傷者傷勢唔嚴重啫！成日話公營醫療系統瀕臨崩潰，今次事件或多或少都反映出，只要執法部門盡忠職守，唔使加強防疫，都可以減輕醫療系統壓力㗎！

講番轉頭，香港治安仲有冇得救？與其奢望港府做到嘢，倒不如人人學武功，個個練到一個打十個，咪可以自保囉！唔係講笑㗎。靠港府，回歸25年嚟一事無成！靠自己，練武25年或者一早就成為一代宗師啦！