政情：開孖頭議辦 鄭泳舜 馬逢國 玩劈木板

向來熱愛運動，早前有參與維港渡海泳嘅鄭泳舜表示，馬逢國過去喺立法會選舉中支持過佢，兩人對體育文化工作都好有熱誠，希望為社區注入新力量。至於馬逢國就指自己同深水埗好有淵源，事關中學時代就喺深水埗度讀喎。而文化體育及旅遊局局長楊潤雄亦有現身，指情商學校借出禮堂並唔容易，亦有出席開幕禮嘅議員同事趁機反映，話依家租場都唔係咁容易喎。

至於開幕禮嘅高潮，就落喺空手道運動員虎虎生風嘅拳腳表演，作為主人家嘅鄭泳舜同馬逢國亦一展身手，作狀擺出攻守架勢，橫眉怒目繼而一記刺拳，面前嘅木塊就一分為二。其他前來撐場嘅議員同事都有模仿空手道動作，並且大吼一聲，希望將體育文化帶落社區。