政情：參與載荷選拔有冀盼 郝小添想太空養蟹

於香港科技大學獲得本科及博士學位嘅郝小添，自小就喺青島海邊長大，因而好鍾意食蟹，後來更創辦農業科技公司，藉人工智能技術養殖螃蟹，而當中又以軟殼蟹同重皮蟹為主；至於螃蟹是否生病或適合食用，人工智能都可以予以識別，有關技術仲可以將蟹嘅存活率由3%至5%上升到95%！被問到今次選拔有咩流程，郝就話簽咗保密協議，不便向外界透露，但近日就勤於游水，鍛煉體魄預備選拔咁話！郝承認科研經驗冇其他人咁多，但勝在年輕，兼且有物理、計算機、資訊科技、大氣氣象研究等跨學科經驗。

吳傑莊因礙於年齡同身高，無緣今次機會，故推薦郝參加，儘管郝一旦獲得選拔上太空，議辦就少咗個技術助理幫手，但吳都話唔介意，認為今次選拔可以畀港青知道，香港仲有好多出路之餘，亦係令到更多港人投入科研嘅一個契機。

吳提到香港創科最大嘅問題係欠缺產業龍頭，難以吸引人才同資金，故只要有產業龍頭，香港創科嘅生態鏈就可以「活起來」。