昔日東方政情：倡禁新生代買煙 議員鬧過嚴
唱K打牌打機各有所好 促勿妖魔化
為遏低吸煙人口，到底可以去到幾盡？《施政報告》提出於明年初就推展控煙工作諮詢公眾，冀吸煙率由去年9.5%，到2025年能降至7.8%。吸煙與健康委員會主席湯修齊早前同醫務衞生局局長盧寵茂會面，盧提及打算倣效外國建立「無煙世代」，考慮禁止向指定年份後出生人士售賣煙草，而湯就建議大幅增加煙稅以迫使市民戒煙。批發及零售界議員邵家輝就反對建議，指成年人會權衡利弊，反問夜晚去卡啦OK唱歌飲酒，又係咪健康呢？
湯修齊尋日出席電台節目時指出，吸煙可引發癌症同心臟病，最終由公共醫療系統埋單。而禁止向2009年後出生嘅人售賣煙草嘅建議，目的係希望吸煙人口可以「截龍」。湯話現今嘅道德同公共衞生標準下，傳統香煙實不應容許出售，只係顧及有煙癮人士先至得以存在，強調唔應該畀年輕人加入吸煙行列。
湯修齊建議擴大禁煙區
湯又引述一項調查，指超過五成受訪者贊成禁止指定年份後出生人士購買煙草，亦有成功戒煙人士表示唔希望下一代成為煙民。因相信最有效鼓勵戒煙嘅方法係大幅調高煙草稅，湯已向當局提出加煙草稅100%，其後兩年再每年分別加50%，到2025年可將香煙售價提升至每包200元。湯仲建議擴大戶外禁煙區，包括所有巴士站、學校、安老院同醫院外10米範圍，長遠希望行人天橋同食肆嘅戶外座位亦可禁煙。
雖然邵家輝都呼籲煙民戒煙，但就指「無煙世代」嘅倡議係「極端」，又指世界上只有不丹一個國家曾實施禁止賣煙，而後果就係私煙充斥，最終不丹都要恢復售賣煙草，仲要降低煙草稅添。邵強調香港係一個自由社會，相信吸煙人士會衡量利弊，而成年人應該有選擇權，更反問晚上到卡啦OK唱歌飲酒、打麻雀、電競等行為是否有損健康？稱個人嘅選擇不宜被妖魔化。
邵又提到本港吸煙人口正不斷下降，甚至係發達城市中最低。對於大幅增加煙草稅，邵認為等於歧視基層人士，有錢人無所謂可以照食，認為並非健康現象。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
