政情：楊德強談「0+3」 遊客觀賽意欲大減

楊德強話，據佢個人嘅接觸以及聽聞嘅反應，專業或高水平運動員其實唔係咁介意「0+3」政策，事關佢哋來港嘅目的係比賽，基本上由抵埗至到比賽期間係集中備戰，即使無得逛街購物或者飲飲食食都唔在乎。但係外地訪客就係另一回事，佢哋嚟到香港若不能觀光，未必有興趣專程來港觀賽。楊又話疫情反覆，難免影響到復常進度同埋舉辦大型賽事，但長遠而言疫情總會過去，香港本身具有實力去爭取舉辦大型體育活動，希望大家畀啲耐性。

談及在任期間嘅感受時，楊慨嘆個人力量有限，期望日後有更多關心、認識同熱愛體育嘅人士加入政府，先可以全面提升體育政策嘅深度同闊度。至於退休後會投放更多時間做運動，楊話除咗訓練，亦會到海外參與壁球賽事。