政情：賞紅葉人潮湧 梁福元嘆居民噩夢

原來佢係擔心欣賞紅葉嘅遊人將如潮水般湧至！事關大棠山道有個楓香林，每年嘅12月中旬到1月上旬嘅時候，就會紅葉盛放，加上附近有千島湖同伯公坳等嘅旅遊景點，令到唔少人嚟觀光打卡。佢話舊年有107萬人次到訪，今年睇怕都唔會少㗎啦，到時候「噩夢」就嚟啦。

咁點算呢？佢話去信咗民政處，要求統籌運輸署、漁護署、警方、港鐵公司、九巴公司同保良局大棠渡假村等等機構派人出席《元朗大棠紅葉特別交通安排跨部門會議》，檢討舊年嘅情況作出改善同跟進今年嘅措施。佢就覺得要官民合作，又呼籲遊人多啲用接駁巴士，唔好用私家車，政府都應該盡早公布封路安排、加密巴士班次等等，又話大棠路沿線嘅改善道路工程盡快完工嘅話，就會令街坊少啲怨言。