政情：議論職安例執法官員空槍唔識答

「寓禁於徵」係政府慣常嘅手法。有見工業意外難以杜絕，當局打算修訂《職安健條例》並大幅調高罰則。有關修訂尋日再次逐條審議，唔少議員都關注部分條文罰則過高，質疑其合理性，同時要求當局交代過往執法情況，惟出席會議嘅官員回應話暫時未有相關資料，建議可到其他委員會查詢，結果招來議員不滿，紛紛批評政府「hea答」，大表失望之餘更反問「即係想解散我哋呢個委員會呀？」

惹起議員關注嘅其中一項條例修訂，係工作場所必須提供足夠嘅飲用水，而違反嘅最高罰款，當局建議由現時嘅一萬元提升至10萬元。議員盧偉國質疑條例修訂嘅合理性以及可執行性，主張罰則必須同干犯行為相稱。議員江玉歡亦持相同見解，質問當局「我哋呢度唔係非洲，過往有冇試過斷水斷電呢？」

質疑提高罰則合理性

盧偉國同時憂慮政府另一項建議嘅修訂，係就礦場、石礦場及涉及隧道工程嘅工業經營，須備存登記冊，以及按照訂明嘅格式填寫，包括附有工友其正面半身照片一張，否則罰款2.5萬元。盧稱執法人員到場巡查後若發現有關情況不符規定，亦未必係好嚴重嘅個案，事關可能「張相甩咗」。勞工及福利局副局長何啟明回應時就話，過往無違法嘅企業毋須擔心，佢亦唔會接受企業將罰款當成營業成本嘅一部分。

何啟明嘅官腔，議員當然唔收貨。盧以「hea答」嚟形容政府回應敷衍，要求當局提供涉罪嘅個案，包括過往有幾多人違反等。何冷不防議員有此一着，搪塞指手頭暫未有數字，又指當局每年喺人力事務委員會上，都會提供年度嘅職安健數字。何話音剛落，盧疾言厲色，指「即係想解散我哋呢個委員會呀？」，對何嘅回覆大表不滿。

過往主持會議曾被指操之過急嘅委員會主席陸頌雄，今次表明係開「長途車」，多次提醒與會嘅委員應聚焦討論，並指若某條文過分糾纏，「傾多廿次都傾唔晒」。又稱除非官員迴避作答，否則議員不停追問只會流於「傾偈」。惟議員陳紹雄強調審議條文必須嚴肅看待，需準確理解立法原意。結果會議討論近4小時後，仲未完成逐條審議階段，需留待下次會議再續。