政情：青年藍圖疑慮多 麥美娟認踢緊波

好多議員都問緊青年藍圖統籌架構係點樣，又因為涉及到跨局決策同措施，佢哋好驚會局同局之間互相將個波踢嚟踢去，麥美娟就解釋話，成個計劃由政務司司長統籌協調，而且要幫助青年人嘅決心係由特首競選開始已經講緊，成個政府都會一齊做咁話。但係班議員都仲好擔心喎，就話好多KPI都唔係由民青局直接負責同控制，到時候KPI唔達標，有冇乜補救措施呢？麥美娟就話青年發展藍圖係一份「活文件」嚟嘅，會重質唔重量，而且政府係有「one government」（一個政府）嘅理念，到時團隊會互相協助㗎啦。

由於呢啲類似嘅問題真係問咗好多次，會議嘅主席廖長江惟有話好多議員都好關心呢樣嘢，相信麥局長都記憶猶新，做議員嗰時都試過畀人當係一個波踢來踢去，而且舊時政府團隊同床異夢嘅情況仲要非常之多添！麥就回應話，「雖然我哋喺度踢緊波，但係目標係一致，就係將個波射入龍門」，仲好有自信咁話「一定係會做到呢個目標嘅」。