政情：立會補選提名期淡靜政黨揀蟀未決定出征

盤點近期政壇要事，當屬立法會選委會界別4個出缺議席補選。雖然提名期今日展開，至本月14日結束，將喺12月18日進行投票。但各大政黨似乎仍處於觀望狀態，對係咪派人出選守口如瓶，甚至連人選亦有傳未決定好，同過往大鑼大鼓嘅造勢有天壤之別，劍拔弩張氣氛似乎不復存在。不過，亦有指各大政黨正在「揀蟀」，待本周開會後將有結論。現時僅得標榜行中間路線嘅政黨「新思維」指將派一人出戰，但仍待開會決定；而由港漂成立、喺立法會佔一議席嘅香港新方向就話唔參選。

社福界議員、新思維主席狄志遠話兩名副主席黃俊瑯同崔定邦都積極考慮出選，但當中只有一人出戰，相信喺本周四開會敲定，而當日會議會有集體決定，現時並無分優先次序，強調兩人均有優勢，包括年齡等，黨內亦期望出選人有議政能力、同各方有良好合作關係。佢又話依家各方俱持觀望態度，無人明確話出選，雖然僅手握自己一張提名票，但對入閘機會持樂觀態度，因舊年佢同黃俊瑯都入到閘。黃曾參選2021年立法會選舉，出戰新界西北地方選區，得票4,066落選，並大幅落後另外兩名參選人。至於崔定邦身兼香港旅遊促進會總幹事、前檢疫酒店營運總監。

香港新方向唔參戰

另外，喺2019年尾成立，約300個會員嘅香港新方向，其議員張欣宇話前日舉行咗執委會討論補選，佢哋決定唔參選，認為選委會界別對新團體而言「挑戰比較大」，所以決定專注現時嘅工作先，但就唔排除未來會再參加選委會界別咁喎。佢又透露新方向入面，本身有幾位成員有意參選，形容佢哋「唔介意行出台前」咁話喎。

新民黨常務副主席兼議員黎棟國尋日亦話補選安排要等開會後決定，依家冇嘢可以講。但各方都預料由澳門前特首何厚鏵姪仔何敬康出選。

民建聯亦話未決定人選，但有指油尖旺前區議會主席葉傲冬，同埋葵青區議員、創新科技及工業局局長政治助理廖添誠嘅太太郭芙蓉有意出戰，佢近期仲積極聯絡選委喎！

據聞，經民聯屬意眼科醫生龐朝輝參選，但有指少壯派都想出戰，包括青委副主席李超宇，亦有指油尖旺前區議員鄧銘心正爭取友好嘅經民聯支持。至於工聯會更加係一致封口，連有冇人有意參選都唔講。