政情：陸瀚民重遇老師 讚電影幕後心思

話說選委會界別議員陸瀚民（Benson）前晚出席香港教育大學榮譽院士頒授晚宴，竟然重遇失散咗27年嘅小學老師鮑吳愛岑。可能年代久遠，Benson第一眼並唔認出對方，而當佢見到鮑太嘅姓名列於院士名單，就開始覺得有啲眼熟；當鮑太上台致詞時，其音容神態就勾起咗佢過去讀小學嘅回憶，鮑太當年執教鞭嘅威嚴形象立刻浮現腦海，相較依家就笑容慈祥。Benson忖測鮑太對自己未必有印象，但當佢上前打個招呼，對方就開口話「你舊年選舉時，我哋成班舊老師都有留意你啊！」

唔單止咁，鮑太仲話畀Benson知，原來《飯戲攻心》呢齣電影當中，用咗佢以前嘅小學母校「樂善堂陳祖澤學校」嘅校徽拍戲。估唔到學校被殺校10幾年後，電影製作人員仲可以搵到咁大嘅校徽，可見幕後工夫真係花咗唔少心思。好明顯，Benson之前冇睇過呢套戲，但聽完吳老師講之後，佢就Cap咗兩張有校徽出現嘅劇照出嚟，當係緬懷一下童年嘅歲月。