政情：嘉年華促銷優惠 陳百里滿載而歸

陳百里話，由於商戶都低價促銷，大大包商品取價都只不過一百幾十，所以今次只係用咗千零蚊咋。佢話喺會場裏面，首先由商界朋友陪同下行咗一轉，跟住覺得唔夠喉，自己獨自又行多一轉，而第二轉先至係出手闊綽同買得最多，幾乎放得入口嘅都有幫襯，譬如買咗唔少水果啫喱、魚皮、日本蝦餅等零食，就算係凍肉都唔放過喎。

既然收穫咁豐富，幾大袋「戰利品」點樣拎番屋企呢？其實陳百里早有準備，佢話已經有部車泊咗喺附近嘅停車場㗎啦，又話買咁多唔怕食唔晒，事關可以拎畀同事一齊分享咁話。