政情：中大校徽風波 校董議員駁火

周二晚嘅校董會閉門討論更換校徽事宜。有報道指會上有校董力撐校長段崇智，仲同議員正面駁火；又指有校董不點名批評，某議員撰文責難中大嘅內容曾提及校董會司庫係受薪，但其實司庫係義務，導致相關議員聞言即刻發火。而3位議員校董不滿校方，並冇交代改校徽用幾多錢。亦有指部分與會者亦唔多滿意，議員未等校方完全回應問題就已經中途離席，步出會場向傳媒批評校方。

當日中途離席嘅議員包括張宇人、劉國勳同鄧家彪。鄧尋日喺社交平台貼文反駁，話自己只係提早10分鐘左右離開。而就算多留一會，事態亦唔會有新發展同埋新嘅資料。正如直至尋日，校方都未回答新校徽嘅實質開支到底係幾多？再者，佢觀察到大部分校董都係同意或爭取恢復使用舊校徽，與會嘅一眾校董之間理應冇乜火花，各人嘅差別只係對校方嘅問責力度而已。佢又話段崇智的確講咗「唔好意思」，不過係因確診而未能親身出席會議先至咁講，而並非就「錯換校徽」致歉。

鄧又指中大不但係國際知名學府，亦係收巨額資助嘅公共機構，相關持份者眾多，而段崇智作為收巨額薪酬嘅機構最高行政負責人，點解確診新冠冇正式同清楚咁對外公布呢？作為公眾人物同公職人員確診新冠並盡快公布，係大眾嘅期望同根本規範，點解段同校方冇發新聞稿呢？段確診期間係咪依然履行職務呢？究竟段確診嘅日期係幾時呢？

面對連珠炮發嘅質問，中大就解釋話段崇智早前到紐約出席泰晤士高等教育世界學術峰會，但準備回程時發現確診，現正喺美國接受治療，因此未能親身出席周二嘅校董會會議，惟有改以視像方式參與，匯報更換校徽一事，強調段喺隔離期間仍繼續遙距工作。