政情：孖林振昇開議辦 李梓敬：立場改變

李梓敬話明白有人會覺得佢同林振昇唔夾，事關佢嘅政治立場傾向中產權益；而來自工會嘅林振昇，理所當然企喺勞工界嘅立場。然而，2019年嘅社會運動，李梓敬深感住屋、貧富懸殊、勞工權益等問題可以話係黑暴嘅催化劑。如果基層或勞工權益遭到漠視，導致社會唔穩定，咁就無論係基層、中產、甚至有錢人，大家都輸。

自此之後，佢就採取較為全面嘅公共行政理念，認為發展經濟嘅同時，亦需多加關心基層勞工嘅權益。而今年亦有多次機會，喺包括取消強積金對沖、爭取失業救濟金等等嘅議題，同工會嘅成員站在同一陣線，為基層勞工爭取權益。

至於「孖頭議辦」之所以選擇喺大圍，林振昇日前解釋，話自己一直都係「沙田友」，從小就喺區內生活、就學、成長，佢話能夠喺居住40年嘅地區服務，覺得非常榮幸，況且佢所屬嘅工會，最早期嘅服務處正正就位於沙田大圍。