政情：推動流行文化得把口 楊潤雄唔識時下歌手

以「聽歌但唔認得人」嚟形容新一代歌手嘅楊潤雄，一味強調過去香港嘅影視同音樂娛樂巨星輩出，睇嚟佢心目中嘅香港流行文化，似乎仍停留喺廿幾年前張國榮同梅艷芳嘅時代，咁就難免同時下嘅流行文化有「代溝」啦！而呢條「溝」仲可能係一條「鴻溝」，距離闊到依家啲歌手究竟係乜嘢面貌都唔清楚，梗係「唔認得人」啦。雖則話唔認得，但早前相當哄動，涉及嚴重舞台意外嘅男團MIRROR，楊仲可以噏得出，指佢哋好受年輕人歡迎，高興佢哋近日復工，至於演唱會屏幕墜落事故嘅調查結果，楊話會盡快公布。被問到政府點樣推動香港流行文化，會否倣效南韓政府投放金錢，楊話必定會投入一啲資源，單係2022至23年度，文化工作已投放50多億元。

講番香港流行文化過去嘅流金歲月，楊話近期內地節目亦有帶動觀眾聆聽香港舊歌，認為昔日香港流行文化可以再活化。其實上個禮拜，楊喺一個記者會中曾指出，流行文化可彰顯香港文化特色，並帶來經濟發展動力，而本港上世紀八、九十年代嘅歌影視文化，影響力遍及亞洲同歐美嘅華人社會，時至今日仍然有唔少海外人士重溫當時嘅作品，故此康文署明年舉行首屆「流行文化節」，就要將香港嘅光輝時代再次展現大家眼前，從而帶動再去思考同進步咁話。