政情：立會補選 經民聯擬推多人出戰

經民聯尋日委任6個地區支部正、副主席。設立地區支部，莫非經民聯意圖將來角逐直選議席？該黨深水埗支部副主席龐朝輝話唔知啦，要問黨嘅決定，但黨內應該一直都不排除參與直選。佢話其實黨不斷都有服務社區，今次只不過完善地區服務架構，加強溝通同培訓。

另外，被問及佢係咪有意參加立法會補選，龐朝輝話有意，但黨內未有決定，應該喺今個禮拜內有決定。佢話黨內就算邊個出選，都會互相支持嘅。

其實，有指經民聯唔一定派一人出選，如果自己可以成功入閘，黨內都唔會反對喎。