昔日東方政情：議員發圍 校方跪低 中大用番舊校徽
雖然香港中文大學嘅官方網頁同社交平台，前日已轉用2008年版嘅舊校徽，但有關更新校徽嘅爭議仍持續發酵。中大尋晚（25日）舉行校董會，就有關新校徽事宜進行簡介同討論。但與會嘅3位議員校董張宇人、劉國勳同鄧家彪，會議都未開完就已經提早離席，嬲爆爆咁話「好難控制自己情緒」，形容「不吐不快」喎，到底會議裏面發生咩事呢？而中大事後發聲明話校董會同意校長段崇智建議用番舊校徽。
張宇人批評，作為中大校長嘅段崇智並無親身列席校董會，而係透過視像出嚟「口噏噏」，中英夾雜咁同眾校董講自己理念，而與會嘅校董枱頭就擺咗一大疊用英文寫嘅「提議」，張就話「唔知係咪覺得我哋唔識英文」，不但完全冇耐性去聽，仲話自己唔想「繼續忍受呢啲伎倆」，又大鬧校方「唔顧納稅人畀咁多錢」，辜負咗好多捐錢畀中大嘅人。劉國勳就質疑更新校徽事件，損壞中大形象嘅責任由邊個負責？
鄧家彪雖然歡迎校方用番舊校徽，但仍不滿校方草率行事，痛斥校方完全冇尊重「博文約禮」嘅校訓，中大應該係思考如何貫徹校訓，而唔係擔心個校徽唔能夠配合「it年代」、「手機傳閱唔夠像真」呢啲「貽笑大方」嘅理由，佢仲話諗諗點樣令學生有世界視野、對社會有承擔，而唔應該「整色整水」，做表面工夫。
要求進行獨立調查
3位議員校董提出兩個訴求，首先係要還原之前嘅舊校徽，其次就係要求校董會主席進行獨立調查，睇睇呢件事點解由2019年8月開始籌謀，但係過程中一直冇同校董會商議、同埋當中用咗幾多錢等問題。
立法會教育事務委員會主席梁美芬，尋日指校董會並不可以作為橡皮圖章，然而身兼中大校董嘅3名議員，同埋好多中大校友校董都對更改新校徽毫不知情，認為中大召開會議諮詢校董會，只係「補鑊」嘅行為。
梁認為今次校徽事件，較上次段崇智獲續任校長更嚴重，而佢已經向立法會提交口頭質詢，要求解釋公營大學校董會組成結構、中大管理層是否出現嚴重嘅判斷失誤、決策是否嚴重欠缺透明度等。佢話校董都被剝奪知情權，其他更無從得知。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
