昔日東方政情：談支援青年 徐英偉強調要得宜
喺年初發生嘅「洪門宴」事件後，徐英偉辭去民政事務局局長一職。離開「熱廚房」幾個月，近排開始又有新搞作，佢又寫文又拍片，唔知係咪想做KOL呢？佢尋日接受黨友柯創盛嘅電台節目訪問，大講佢對依家青年同香港嘅睇法，期間柯仔仲不斷讚佢「動靜皆宜」、「網紅」添！
適當引導 避行歪路
基於之前份工嘅關係，想必徐英偉都好關心香港年輕人嘅發展，佢話最希望畀有心有力嘅年輕人繼續發展香港政治，年輕人仲應該寫屬於自己新嘅一本書，又話覺得依家年輕人相對佢嗰時都好幸福，但就強調唔可以畀太多支援，因為佢覺得人要自己落手落腳先可以成長，如果樣樣嘢都幫年輕人整好晒，只會令佢哋變得麻木。之不過，佢話畀年輕人空間發展之外，都要適當引導，避免佢哋行歪路咁話喎。
熱愛運動嘅佢亦分享咗最中意玩嘅欖球，話10幾年前係佢嘅小朋友學，佢先有得參與其中，佢話希望香港父母都可以同年輕一代一齊參加運動。佢又猛咁同聽眾推銷香港好靚，為此仲拍咗片介紹香港添！佢話香港都有好多郊外、文化同文青景點等待港人去發掘同體驗喎。又拍片又筆耕，唔知下一步佢會唔會出書呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
