政情：新設計捱批疑跪低中大官網翻用舊校徽

為咗迎接明年60周年校慶，中文大學喺今個月17日推出新校徽，但隨即惹起爭議，多名身兼校董嘅議員鬧爆事前冇諮詢，其中有議員更大鬧「當校董死嘅」！雖然遭到連日批評，但中大就好少理，照將官網、Facebook同Instagram等社交網站頭像轉用新校徽，點知過咗一個禮拜，尋日朝早又突然改番用2008年版嘅舊校徽喎。係咪跪低？有議員就話只不過係「補鑊」，但「Damage is done」（傷害已經造成）咁話喎。

唔單止身兼校董嘅議員批評冇被尊重，教育事務委員會主席梁美芬亦批評中大校方欠缺諮詢，促請中大增加透明度，又話教育事務委員會認真考慮去檢視大學嘅管治問題。

校董之一嘅議員鄧家彪就對呢件事感到「愕然」，仲話唔知道原來「校政人員權利可以大到咁」，佢仲話「好想知道點解會用呢個logo」。

唔知係咪聽到檢視大學管治，中大校長段崇智稍後亦發聲明，話校方連日來收到唔同嘅意見，會同各界溝通，聽取意見，甚至開始「轉軚」，話唔會急切作出改動。

校董鬧爆已造成傷害

紛紛擾擾一個星期，校方今日下晝會向校董介紹新校徽，跟住召開嘅校董會就會開會討論，但中大官方網頁同社交平台尋日又突然改番用舊校徽，但中大資訊科技服務處網站，仲用緊簡化版嘅新校徽圖像，即係冇咗校訓「博文約禮」。

鄧家彪對換番舊校徽嘅決定表示歡迎，仲話換校徽需要更多時間討論，而唔應該草率行事。另一議員劉國勳則認為中大只係因為群情洶湧所以先「補鑊」，成件事顯示咗中大嘅程序問題同管治問題，佢又話無論新校徽靚唔靚，都唔可以忽視相關設計費用、損壞咗中大形象等嘅問題，佢就問呢啲問題應該由邊個負責呢？佢話無論點樣「Damage is done」（傷害已經造成）。

點解會換番舊校徽？校方嘅回應只係話今日校董會將討論校徽，其他問題一概要等到開完會後先回應。唔知道最後會點收科呢？