腳抽筋游過海 容海恩照完賽

喺比賽前夕，Eunice已經好緊張，喺社交平台貼文話喺半夜再細讀維港泳比賽路線圖同須知，話一定要喺50分鐘之內完成比賽，希望風浪不大，所以有壓力。係咪因為有壓力而導致喺賽事途中抽筋？佢話唔知係咪熱身做得唔夠，而落水冇耐就要提速，再加上後面嘅參賽者大批湧上嚟，速度唔可以慢落嚟，到咗中後段開始體力不繼，雙腳有輕微抽筋，事關佢平時都係慢游，但今次逼住要好快，唔係好慣。佢形容呢次亦係自我挑戰，能夠完成賽事覺得已算係超額完成。

身為旅遊界議員嘅姚柏良就話維港渡海泳有助推廣香港旅遊，期望因應疫情放緩，能夠吸引外地遊客一齊參與本地體育賽事，又形容未來若果能夠同外地旅客一起參與比賽，將會係「樂遊（遊客）游」。鄭泳舜亦大讚水質好靚，期望下屆渡海泳同明年舉辦嘅渣打馬拉松，參賽嘅名額可以增加。咁防疫措施會唔會減少吸引力？佢話檢測同戴口罩等規定係為咗香港同個人必須嘅措施，又話措施已逐步放寬，例如七人欖球賽容許觀眾入場飲食。