政情：周浩鼎介紹市集 黃碧嬌攝位突襲

被「突襲」，Holden冇受傷，仲好好笑容添！話說佢喺元朗周末市集現場做Live，講吓市集有好多攤位，又有唔少年輕人參與，講講吓突然有個人喺後面出現，Holden先係好愕然，點解有個人會入咗鏡？幾秒後，佢就笑起上嚟。點解？因為佢認出嗰個係佢嘅黨友、大埔區議會前主席黃碧嬌（嬌姐）。

做乜要嚟踩場先？嬌姐話佢係嚟偷師嘅，Holden先恍然大悟，記起大埔同時都搞咗個周末市集。比較過兩地嘅市集，嬌姐覺得大埔市集地方細同比較逼，元朗地點好啲，地方又大啲，貨品嘅種類同款式都多啲。

Holden話要支持吓本地農業，於是喺市集買咗好多有機農作物，當中包括粟米同木瓜，花費咗幾百蚊。

由於新一份施政報告提及民政事務總署喺今年第4季會喺全港5區同團體合辦周末市集，話要推動本土經濟，而食物環境衞生署亦會參考經驗，喺出年舉辦周末市集，Holden同嬌姐都話由於市集會交波畀食環署，遲啲就會向食環署反映呢兩個市集有乜要改善嘅地方。