政情：巴士廠設託兒所 林琳倡讓婦女工作

林琳話巴士公司近年求才若渴，只要女士願意任職車長，即使係半職上班亦無任歡迎。鑑於巴士車廠空間廣闊，員工專用設施如超市、理髮同休息室等一應俱全，何不增設託兒所，女士就可以安心工作啦。就林琳呢個建議，巴士公司話諗得過，於是佢早前約同則師朋友到巴士廠實地考察，指硬件上只要注意出入通道同相關消防規定，巴士廠設託兒所嘅可行性甚高。不過，有關巴士廠嘅土地條例，能否出現員工專用嘅託兒設施？咁就要局方研究研究啦。

若果成事，林琳認為屯門巴士廠係一個唔錯嘅試點，事關附近多屋邨，勞動力充裕。佢又話依家都有好多需要照顧子女嘅單親父親，至於企業提供託兒服務，既可樹立企業形象，亦減輕政府搵地開託兒所嘅壓力，係多贏方案咁話。