政情：劏房童未坐過梳化 陳克勤心痛

上個禮拜克勤應一個告別劏房嘅家庭邀請，去佢哋新遷入嘅公屋作客。佢話一入門口，呢個家庭嘅9歲囡囡好熱情咁拖佢隻手，帶佢去客廳坐低，而女戶主就話囡囡好開心，事關可以喺屋企坐梳化。佢聽到呢句說話覺得好心痛，因為梳化咁普通嘅傢俬，喺基層市民眼中竟然成為奢侈品，反映房屋問題之嚴重，已經去到一個臨界點。

後來克勤喺社交平台上載探訪呢個家庭嘅片段，貼文話心痛一個9歲嘅小朋友竟然從未坐過梳化，可想而知劏房嘅生活環境極唔理想，而呢個劏房家庭係等咗9年先上到樓。

政府預期喺5年內將輪候公屋時間壓縮到4.5年上樓，克勤話係一個進步，但係同房委會提出嚟3年上樓嘅承諾仲係有一段距離，追問政府會唔會3年上樓作為政策嘅目標？甚至有冇辦法喺4.5年再縮短一啲？不過，政府就重申暫時只能夠做到咁，日後社會上可以集思廣益，盡力諗方法去做。