政情：田北辰發問唔知限時 主席出口三度制止

田北辰發言批評，施政報告完全冇提及「0+0」以及對外復常路線圖，指即使銳意舉辦大型展覽同國際盛事，都要有相當數量嘅入境人士，但現行嘅入境檢疫政策則構成妨礙。田又枚舉一堆數字強調疫情可控，但都未講到佢要提出嘅問題，主席梁君彥見時間分秒流逝，隨即出聲提示田北辰，要求佢提出問題。

然而田似乎未有理會，指「0+3」嗰3日，啲遊客點會嚟呢？又反問特首「你試吓放假去旅行，會唔會揀個城市落機之後……」梁君彥見田嘅發言滔滔不絕，於是再度出聲提示嗌停，畢竟發言時間只有1.5分鐘，點知田脫口而出「主席我仲有10分鐘」，無啦啦多咗幾倍發言時間，梁按捺不住，提高聲線話「田北辰議員，請你停止！」跟住就示意特首發言回應。

特首開腔回應田，話「非常知道你想講乜嘢」。佢話冀盡快吸引旅客來港，係每一個人都好關心嘅目標，之不過田考慮嘅因素唔及佢咁多，其實復常路線清晰、方向不改，所以唔可以話冇路線，之不過依家唔可講下一個月會點做啫。至於田喺會後就向梁君彥道歉，指規則定明1.5分鐘，但冇響鐘，自己冇為意，所以先至會產生小爭拗，強調「係無意嘅」。

其實喺田之前，會計界議員黃俊碩同選委會界別議員郭玲麗，喺發言時都因為鋪陳過長，畀主席叫停。另外，議員林順潮發言關注藥物問題，詢問政府會成立香港藥監處嗎？點知林將最尾嘅「嗎」字，本應（maa3）嘅讀音，聲調上揚讀作（maa1），引來哄堂大笑。