要聞港聞

政情:為大仔報小學 陳家珮四圍撲

陳家珮話幫小朋友報讀多幾間學校,當係多幾次面試嘅機會。 陳家珮話幫小朋友報讀多幾間學校,當係多幾次面試嘅機會。
陳家珮話幫小朋友報讀多幾間學校,當係多幾次面試嘅機會。
望子成龍,好多家長都希望子女能夠入讀名校。議員陳家珮(Judy)日前出席網台節目,談及佢嘅大仔因升讀小學,身為家長嘅佢過去一段時間做咗好多準備工作,除咗要幫大仔物色課外活動,仲要上面試班、聽講座、為小朋友撰寫履歷表。佢忙咗一大輪之後深有體會,呼籲家長要盡早培養小朋友嘅興趣,同埋掌握心儀學校嘅特性同文化,以提高取錄嘅機會。
慨嘆每間學校都有唔同文化
眾所周知,入讀名校競爭激烈,所以Judy早前同大仔去參加面試班,除咗要補習全科,即係中、英、數、常識、邏輯之外,仲會提供講座,教導父母如何為子女製作履歷表,同埋有關頂級名校嘅專題講座,務求令家長對心儀嘅學校能有所掌握,例如相關學校喜歡招收邊啲小朋友呀、過去幾年面試出過啲乜嘢題目咁呀。小朋友若身懷多張證書,獲取錄嘅機會較高,於是上面試班之前,Judy同大仔去學打鼓、普通話朗誦等,不過礙於疫情,難以舉辦實體興趣班,變相令到大仔能取得嘅證書,唔及得疫情前嘅小朋友咁多。
講到小朋友嘅「興趣」,Judy話自己當初秉持嘅心態,係小朋友鍾意乜嘢,咪畀佢繼續玩落去囉,但經歷過呢幾個月,佢深感每一間學校都有不同嘅特性同文化,譬如有啲學校會認為彈鋼琴太普遍,冀招收一啲能演奏特別樂器嘅小朋友;又例如有啲學校喜歡小朋友早啲學Coding(編程),以迎合近年Coding或STEM課程嘅潮流。而佢得出嘅小小經驗,就係最好提早為小朋友選擇樂器或者課外活動,同埋要留意心儀嘅學校,佢哋有咩校隊,或會舉辦乜表演活動,咁就唔會嘥心機咁話。
雖然每個家長都有其心儀嘅學校,但Judy話自己同其他媽咪一樣,採取「漁翁撒網」策略,即使係其他學校都照樣報咗先,當係畀小朋友參與多幾次面試機會,之後嘅談吐表現就會無咁緊張㗎啦,反正報名費唔係好貴,大多數係收幾十至一百蚊左右,所以大部分家長都會揀「全餐」囉。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500