政情：議員有共識女士着綠色

全程近三粒鐘眼皮重肚空空

政府尋日喺立法會會議廳發表嘅新一份施政報告，歷時2小時45分鐘，咁長時間，有個別議員未必頂得住，即使未至於瞌眼瞓，但勉力撐開雙眼都唔易捱，好似選委會界別議員劉智鵬就用手肘托住頭，眼瞼半睜看似閉目養神，口罩脫落吊吊揈，抑或係想抖吓氣呢？至於飲食界議員張宇人，就喺宣讀施政報告期間進食，莫非提神嘅方法係靠咀嚼？

葉劉鮮綠色大格仔出場

今次施政報告嘅封面係採用湖水綠配深綠，好多女議員嘅衣着都刻意揀選類似嘅顏色，例如議員梁美芬就穿淡綠色，陳曼琪就着上深綠色外套；身兼行政會議首席議員嘅葉劉淑儀就着咗鮮綠色大格仔，佢嘅黨友容海恩可能為免「撞色」穿上白色外套，但就喺頸上掛一條綠色圍巾。

男議員臨時換襯色口罩

雖然男議員穿着嘅西裝以黑、藍、灰居多，難以做到女議員咁特登襯色，但依然可以具備「綠」嘅元素，唔少男議員喺施政報告發表前臨場換上綠色口罩，而轉咗跑道做律政司副司長嘅張國鈞就打咗條鮮綠色領呔。