昔日東方政情：快樂游渡海泳 3議員有個約定
嚟緊周日（23日）就係維港渡海泳嘅日子，首次報名參賽嘅議員容海恩（Eunice）近日積極備戰，不時到泳池操練，又搵埋老公袁彌昌指導以改善泳姿；上星期更約埋鄭泳舜、姚柏良呢兩位同樣出戰渡海泳嘅議員同事，一齊到海灘練習。相較於獨自練水，Eunice話3人同游更開心，預料屆時同1,500健兒由金紫荊廣場公眾碼頭游到去終點尖沙咀星光大道，會更興奮咁話。
完成賽事 星光大道留影
同樣係初次出戰維港渡海泳嘅姚柏良就話平日搭渡輪過海，都會喺船上眺望金紫荊廣場同星光大道，可以想像當日置身維港之中從另一角度欣賞呢兩個地標景色，肯定難忘。佢又話要響應大會今年嘅口號「全城游出快樂力量」，因此已經同兩位議員同事約定，賽事當日喺終點星光大道影相留念，之後再同大家分享喜悅。
玩開3項鐵人賽嘅鄭泳舜話近期本港陸續有體壇盛事舉行，繼月初做觀眾睇完世界桌球大師賽，好快就輪到佢自己落場，第二次參與維港渡海泳。喺海灘練完水之後，佢形容兩位議員同事嘅狀態唔錯，話知道仲有啲議員同事喺游水方面都應該好叻，希望明年再有多啲同事報名參賽。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
