政情：換校徽欠透明度 中大零諮詢離譜

中大尋日回覆傳媒話，舊年曾透過不同形式諮詢2,200名持份者意見，並積極向中大校董會提供今次品牌更新計劃資訊，包括舊年「大學校董會集思日」上與校董會討論計劃發展方向，並於上月22日會議上，向中大校董會執委會呈交最終建議。中大嘅議員校董，包括張宇人、劉國勳同鄧家彪都異口同聲咁話，有關新校徽嘅設計及開支等，並冇喺校董會討論，批評校方處理失當。梁美芬尋日就以教育事務委員會主席嘅身份回應事件，話自己都同議員校董一樣，事前未獲諮詢，都係從媒體報道先得知事件，佢促請校方必須盡快向公眾作出合理解釋。

梁美芬又話，自從2019年反修例事件，到校長續任問題，唔少持份者都擔憂中大日後嘅發展方向，而教育事務委員會嘅眾多委員，質疑中大管治已有一段時間。佢覺得依家有需要，考慮重新檢視大學管治問題。不過佢又補充話，檢視現行監督機制，同學術自主無關，強調政府一直尊重同容許大學管理層自己處理行政問題，不過出現管治問題就唔可以用「學術自由」作擋箭牌。

中大「聯書院學生會平台」小組喺新校徽出爐即日發起網上問卷，不足一日獲逾3,000人回應，結果大比數反對改校徽，籲校方考慮暫緩使用新校徽。

其實自從反修例事件之後，中大就不時招惹是非，尤其係校長段崇智遭外間批評佢喺反修例運動期間嘅立場同表現，令中大蒙上「暴大」污名。本來，段崇智嘅校長任期去到明年底先至屆滿，但校董會喺今年4月就通過提早續聘，事件引嚟建制陣營大肆撻伐，更有人揚言要提交教育事務委員會討論。雖然事情有機會隨時日嘅推移而丟淡，但議員校董張宇人仍然窮追猛打，早前就話要提私人草案改組中大校董會。結果事件仲未平息，依家又爆多單校徽風波，睇嚟中大今次真係有排煩啦！