政情：初戰乒乓單打 梁栢賢攞季軍

咁就諗多咗嘞！實情係PY日前第一次參加乒乓波單打比賽，攞到初級組季軍呀！佢都不知幾開心。眾所周知，PY係「球王」， 精於網球、壁球同羽毛球，喺舊年更突然醉心打乒乓波，估唔到練咗唔係好長日子，就有咁好成績。

知到佢捧盃之後，唔少網友都留言恭喜佢，前衞生服務界議員李國麟讚佢「堅」，另一名前議員李華明亦話要同佢較量，話「真係要同你打場波！」有網友話「嘩，搞到我有啲壓力」，而PY就謙稱「唔怕，我距離你嘅水平仲好遠」；另有網友講到佢好明顯慢慢打上去，攞多幾個盃啦！

以前PY都會喺社交平台貼文，講吓對疫情嘅睇法，而喺確診個案回落之後，佢就一度封筆，但冇耐又再貼文，不時批評政府所採取嘅防疫同抗疫措施不合時宜，又話政府應該盡快推「0+0」，仲話時間唔等人，期待政府施政報告有好消息咁話。