政情：鄧飛好怕蛇 細個聽故事都驚

話說鄧飛日前去完一個小學生偵探推理遊戲比賽頒獎典禮後，就喺社交平台貼文，話佢細個嘅時候，喺媽媽啟蒙下學睇《福爾摩斯》小說，第一個閱讀嘅故事，或者應該講係媽媽同佢講嘅第一個偵探故事，係The Adventure of the Speckled Band（花斑索命帶），呢個故事就嚇親佢。為乜咁驚呢？因為佢好怕蛇。事關呢個故事係講有人設計用毒蛇去殺兩姊妹。

唔單止睇書，佢話媽媽仲經常帶佢睇各種偵探破案電影，尤其係反間諜同反特務電影，跟住佢仲反問有冇見過咁樣嘅媽媽？佢憶述嗰時屋企仲有一啲係50至60年代出版嘅前蘇聯克格勃KGB反間諜小故事書，媽媽好鍾意睇，亦直接影響到佢，所以佢唔單止鍾意偵探小說，更喜歡反間諜同反特務文學。

可能因為咁，鄧飛早年教中史嘅時候，諗到由班學生一齊做「偵探」，利用史料推敲宋太祖趙匡胤之死等嘅事發經過，嘗試拆解歷史懸案，嚟引發學生對中史嘅興趣，效果唔錯添！