政情：居家安老 陳健波：經濟援助要周到

波哥喺社交專頁指出，長者要享受有質素嘅晚年生活，由同住嘅家人負責照顧，無疑係會更細心。但對於全天候照顧長者而不能外出謀生嘅人而言，一方面未必有收入，另一方面又要應付醫療及生活開支，沉重負擔形成巨大嘅精神同經濟壓力，況且香港亦有唔少「以老護老」嘅情況！儘管政府透過關愛基金向照顧者提供生活津貼，不過申請門檻好高，而且津貼亦只得二千多元。

所以居家安老要做得好，波哥建議政府應該多方面加強對照顧者嘅支援，除咗要減輕佢哋嘅經濟壓力，亦要提供暫託、精神支援等服務。波哥又話，大家都會老，今日你係照顧者，他日會成為被照顧者，而有家人嘅照顧，總比外傭或老人院親切。佢話改善對照顧者嘅支援，政府就可以節省大量興建老人院嘅土地同埋人手費用，其實係雙贏咁話。