政情：職安最高罰金爭議不停 政府指須具阻嚇性

之所以要降低最高罰款額，陳紹雄提出嘅理由係必須顧及業界人士嘅憂慮。不過勞工界議員郭偉强指草案已一改再改、退無可退，批評提出修訂嘅議員得寸進尺，仲話只有屢勸不改、明知故犯嘅公司先會被課以重罰，而呢啲極為惡劣嘅公司不應喺業界存在。工聯會職安健協會主席林淑儀就舉例指，曾有塑膠回收工人因工死亡，法庭只判罰款1.1萬元。

政府方面，勞工處尋日書面回覆話，可公訴程序定罪罰款額提高至1,000萬元，事前已參考其他先進國家及地區，又曾向僱主及僱員代表等不同持份者進行廣泛諮詢，因此1,000萬元係「合理、務實、具阻嚇力」。至於簡易程序提出嘅最高罰款原先係50萬元，就遠低於其他先進國家及地區，須提高到300萬先有阻嚇力。至於檢控時限由12個月修訂為9個月，勞工處就話考慮社會意見，或有斟酌嘅餘地。