政情：舞台意外續追究 狄志遠盼再交流

意外發生後，狄志遠曾去信特首辦要求跟進舞台意外，結果佢嘅訴求就一度被轉介至政府查詢熱線1823，負責調查事件嘅文化體育及旅遊局局長楊潤雄更拒絕接見。尋日嘅會議上，狄志遠就講番佢同政府溝通嘅不快經歷，內會主席回應話，相信政務司司長陳國基都聽到，又話溝通係雙向嘅，如有意見都可以去司長辦公室以表達訴求。議員林健鋒都幫口，話前廳交流會都見到唔少官員，可以趁機同司局長反映㗎嘛。

另外，立法會議事規則委員會早前要求幫各委員會改名，以更好配合依家政策局嘅範疇。委員會主席謝偉俊話，希望2022年內盡早生效。議員葉劉淑儀就提到，資訊科技及廣播局早已經不存在，立法會資訊科技及廣播事務委員會嘅名稱同範疇都已經過時，需要改名。