政情：中英夾雜畀主席窒梁美芬憤離會議室

衞生委員會又現火爆場面

香港地華洋雜處，言談間夾雜幾句英文，已成為港人嘅語言習慣。立法會衞生事務委員會尋日朝早召開會議，儘管會議開始之初，主席張宇人提醒在座嘅議員，發言不宜中英夾雜，以免為難即時翻譯嘅同事，然而議員梁美芬用中文發言時，唔覺意咁講幾句英文，張即場「指正」，並同梁短暫駁火，當官員回應質詢後，梁霍然離席，表示不滿。

話說會議期間，梁美芬關注到有涉嫌失德嘅醫生疑濫發免針紙，但法庭未作出裁決之前，涉案嘅醫生仍然應診。佢詢問醫務衞生局局長盧寵茂，究竟政府有無權限，阻止免針紙濫發嘅事情發生？佢又追問涉嫌濫發嘅二萬多張免針紙當中有300人可能係公務員，點解咁遲先至發現？跟住佢就話「其實我唔係嗰啲Data Science（數據科學）嘅Expert（專家），但照計睇到一啲Irregular（不尋常）嘅事發生，其實都應該……」

「局長聽得明，OK？」

梁美芬話音未完，就遭到張宇人「閘停」，重申先前已經同大家講咗，發言一係用中文，一係用英文，總之唔好兩者夾雜。不過張嘅提點，梁似乎唔當係一回事，反駁話「主席，你唔好嘥我時間啦，局長聽得明，OK？」張就話並無嘥佢嘅時間，而即使局長聽得明，都要留意負責翻譯嘅同事，發火話「就算你唔喜歡我話你中英文夾雜，但係我都要話畀你聽，唔應該中英文夾雜！」

面對指摘，一再強調「局長聽得明」嘅梁美芬就話自己都做過主席。但張仍寸步不讓，話「你做過主席……你鍾意點做係你嘅事」由於梁嘅發言時間只剩半分鐘，於是就要求張「畀番啲時間」，不過張就企硬，表明「係唔會畀時間你嘅……你要用中文就用中文，用英文就用英文！」梁亦不甘示弱，話「呢啲咁精彩嘅問題」一定要局長回答，又話「主席，你再係咁樣，大家係唔服氣㗎。」

「關於一啲免針紙……」當盧寵茂一開聲，張突然插入一句「局長！」似乎想阻止發言，但稍為停頓嘅盧見張未有進一步動作，就續指若牽涉到可能造假嘅情況，當局將會轉介畀醫務委員會去跟進有關醫生嘅專業操守。又話考慮到涉事醫生已進入司法程序，政府係會暫停佢哋發嘅免針紙，至於疫苗接種，同埋長者醫療券，都會暫停。

盧寵茂回應過後，梁美芬明顯怒氣未消，迅速收拾枱面文件，悻悻然步出會議室。其實上月9日嘅衞生事務委員會都出現火爆場面，議員田北辰因打斷盧寵茂嘅發言，遭到張宇人批評無禮貌，從而掀起田、張兩人逾3分鐘罵戰，最終田被張驅逐出會議室。