政情：帳委會陷困 謝偉銓辭任 成員剩3人

陳振英早前坐正做立法會財務委員會主席，日前以「平衡工作」為由辭去帳委會主席一職，而劉國勳亦解釋，本來想做兩年㗎，等黨友熟習議會工作就交棒，而黨友、會計界議員黃俊碩好快上手，所以諗住交畀佢。至於Tony辭任，唔知係咪都係同一理由，想交棒畀G19嘅同事呢？

本報記者問Tony點解辭任，佢話見到辦公室同事工作量太大，加上帳委會一有議程提出就要盡快討論，往往要喺短時間內投入大量精力。佢一方面覺得兼顧唔到咁多，另一方面又發現，其實好多人都有興趣，倒不如就讓畀其他有興趣嘅同事嘗試啦！被問到懸空嘅位置，會唔會由G19成員填補番？Tony就話唔知啦，暫時未見G19成員表示有意加入。講開又講，佢話有時G19成員太過禮讓，其實都可以進取一啲咁話喎。聽聞帳委會其中3個空缺將會由議員邵家輝、簡慧敏、黃俊碩接手，換言之，只係差Tony個位未有人接棒。而環顧各板塊，經民聯未有成員參與帳委會，唔知會唔會打算爭取一席位呢？

連同陳振英、劉國勳、謝偉銓3名議員辭職，再加上早前轉跑道任審計署署長而辭任嘅林智遠，導致帳委會有4個委員出缺，而剩下嘅3名成員，就包括副主席謝偉俊、委員容海恩同陸頌雄。議事規則委員會方面，因張國鈞早前出任律政司副司長而辭去立法會議員，同時辭去議事規則委員會副主席一職，令議規會出現一個空缺。內務委員會嘅文件話，將於10月21日嘅會議上進行選舉，以填補相關空缺。