政情：5度申提議案終事成梁熙簡慧敏甩黑仔污名

立法會暑假休會期快將過去，早前有21名議員打算喺本月復會後首次大會提出議員議案，最終只得兩名幸運兒爭到「頭啖湯」，當中包括抽咗5次，今次終於被抽中嘅香港島東議員梁熙同選委界議員簡慧敏，不過唔知佢哋有咩議案想發表呢？

爭到復會後頭啖湯

梁熙就想講「從速為港島東區市區更新規劃進行研究、落實東區重建大綱圖及制訂重建時間表」。其實佢喺早前已經講過筲箕灣同西灣河等社區急促老化，即使兩者同樣位於市區，卻欠缺整個地區嘅整全重建規劃研究，希望發展局可以責成市建局，喺東區進行市區更新嘅整全研究、等居民可以對自己社區嘅未來有所憧憬及期待。至於簡慧敏就提出「為數字經濟發展和數據安全立法」。

其實議員議案係冇立法效力嘅，純粹畀政府聽吓議員意見，之後再決定是否採納，不過有得講好過冇得講啦。

梁熙同簡慧敏總算係搣甩「黑仔」之名，5度申提議案終於成功。