政情：管街市翻新食環想轉常額位議員反對亂花費

街市殘舊冇冷氣，對檔販而言不但「趕客」，暑熱天時就連豬肉都容易變臭！食環署喺2018年計劃預留20億元開展街市現代化計劃，並為此而設一個編外食環署助理署長嘅職位，點知尋日上到去議會，當局就話要將編外轉為常設，於是就惹來好多議員質疑常設職位有冇必要，又話睇到街市翻新完之後個樣覺得「好悲哀」，簡直係「嘥錢」嘅行為啦，之不過面對種種質疑，環境及生態局副局長黃淑嫻就堅稱常額職位有用喎。

部分食環署轄下嘅公眾街市已經啟用咗一段唔短嘅歲月，即使設施已呈老舊或不足，但當局通常只靠小修小補，用簡單工程敷衍了事。譬如40年前落成嘅葵涌榮芳街街市，一直都冇冷氣，環境悶熱之餘，更有市民投訴話買豬肉都會變臭；而西貢街市一去到夏天，室溫仲隨時高達攝氏40度！黃淑嫻尋日上到議會，指食環署解決西貢街市嘅熱浪問題，就係使用冷風機。

話編外職位到期可以再續

議員鄧家彪就話加部冷風機咁簡單，「議員助理都得啦」，點解要「重金禮聘」助理署長呢？議員張宇人就話，早前大圍街市進行翻新工程，連累檔販搬出搬入，搞完一大輪效果都係差強人意，又嘥錢，話睇見都「好悲哀」，明確表示其所屬政黨反對開設常額職位。張嘅黨友邵家輝，就指一個首長級常額職位年薪同福利加埋超過300萬元，鑑於疫情下政府收入少但開支多，編外職位到期咪續囉，冇乜必要搞常額。

究竟呢個常額職位要負責乜嘢呢？黃淑嫻話要推展街市現代化、發展新街市、街市翻新同改善工程。但係好多議員都話，呢啲工作搞完就算啦，毋須常設。何況設一個常額助理署長，又唔會縮短工程時間。黃淑嫻就話，部分地方例如洪水橋嘅首批公營房屋2024年先可以入伙，街市到時候需要視乎人口進行配套，如果冇一個常額職位，就難以繼續推展新街市。

議員何俊賢指出，街市現代化或興建新街市，往往涉及檔販搬遷，或裝設冷氣等大大小小嘅問題，質疑一個常額助理署長能否應付；又指欠缺實際「現代化」方向的話，助理署長可能變相成為「監工」添。面對種種質疑，黃淑嫻就話會喺文件上補充得更完善，說服大家加設常額職位係有用咁話。