政情：睇展覽即場變身象哥「穿越」做儒生

前排好多電影同電視劇都講「穿越」，就連進出口界前議員黃定光（象哥）都試過「穿越」，返咗一轉古代喎。

早前象哥換咗新形象，事關佢留咗長鬚加埋一頭白髮。咁啱，佢早前去咗個香港珍藏大展，展覽場地仲整咗幾個明、清朝嘅廳、房同書房，到訪嘅象哥竟被臨時拉夫，換咗一身古裝扮相，見佢戴住高帽、右手執毛筆、左手拎起線裝書，一個儒生咁款，似模似樣。之但係，當佢屋企嘅「行政長官」、即係太太林淑儀拍埋去，就即刻由古代扯返到現代嘞！

靠護髮素柔順長鬚

呢把長鬚由今年元旦開始留。咁打理長鬚麻唔麻煩？佢話一直都係洗頭兼洗埋啲鬚嘅，初期冇咁長嘅時候，由於啲鬚比較硬，乾咗之後飛起晒好似張飛咁，所以後來洗頭、洗鬚都加咗護髮素，咁先柔順番，到再長啲，就要出去搵專人護理嘞！退下火線之後，佢都少咗出席公開場合，佢仲話早前去升旗禮，當時戴住口罩，冇乜人認得佢呀！