政情：與吳秋北隔空駁火 江玉歡企硬 地辦拆夥

雖然吳秋北日前話開辦事處係為咗服務市民，所以就會繼續一齊合作，但江玉歡強調要終止合作。而尋日去過兩人嘅辦事處，相關宣傳品仲未拎走，包括提供證件相服務等，亦仍放有印有兩人頭像嘅直幡，其中一張海報為萬聖節慶祝活動，將於本月29日舉行，指江玉歡會同小朋友喺隔籬空地整小勞作，唔知會唔會繼續舉行呢？本報記者亦曾向該聯合辦事處職員了解，吳同江兩人合影嘅傳單會唔會下架，惟職員回答「唔清楚，我只係服務地區。」

其實，江玉歡同鄧家彪喺觀塘翠屏合辦聯合辦事處，江都話會終止合作，而相關宣傳品尋日同樣未下架，仍顯示兩人嘅聯合頭像。據悉，北角嘅辦事處由江玉歡抽中，理論上吳秋北辦事處會遷出：而觀塘嘅議辦則係由鄧家彪抽中，故江本人會遷出。而江尋日接受訪問時都話爭拗係小事，坦言唔希望繼續發酵落去。