政情：吳秋北江玉歡互鬧 孖頭議辦照搞

吳秋北前日喺社交平台貼文批評過往反中亂港分子用搶眼球、撈選票嘅伎倆，呢種歪風滲入議會，批評有議員「表演」、譁眾取寵同博出位，仲話要警惕添！江玉歡之後亦喺社交平台話明眼人都知係批評緊佢，佢話向醫務衞生局局長盧寵茂問程序問題，話盧冇權力廢除免針紙，反問自己代表受影響市民做出一個直接質詢有乜唔妥，仲話面對呢種誹謗式嘅不實指控當然會保留一切追究嘅權利。

件事鬧到咁大，吳尋日朝早出席一個公開活動後，被傳媒問佢點睇呢件事，佢就揮咗兩下手話唔答問題，之後急急腳搭車走啦！呢兩位議員早前仲一齊開孖頭地區議員辦事處，之前吳仲話江係「好拍檔」添，唔知依家會唔會影響佢哋合作呢？佢下晝出席另一活動時再被傳媒追問，佢就叫大家去睇文章啦，佢覺得文章已經好清楚同冇嘢補充。咁佢哋嘅「孖頭」議辦點處理，佢話開辦事處係為咗服務市民，所以會繼續一齊合作喎。