政情：陳學鋒管浩鳴開舖 高官笠高帽

管浩鳴謙稱自己係政治素人，對服務基層無咩經驗，好多謝陳學鋒畀呢個學習機會佢，又形容尋日開幕簡直係天公作美。至於陳學鋒就好大聲咁講我哋返嚟喇，又有機會服務街坊，會互相努力喎。張國鈞就指兩人係地上最強組合，因為陳嘅地區經驗豐富，而管就喺教育同社福有強勁網絡，笑住祝兩人「生意滔滔」！

現場另一個焦點仲包括立法會選委界別補選，事關有政黨仲內部協調緊人選，而有政黨人士尋日就話前任油尖旺區議會主席葉傲冬亦都有意願參選，會積極考慮，黨內亦暫時未有初選時間表。