昔日東方政情：立會餐廳新集團接手 梁君彥驚變議員蛇竇
經營立法會大樓餐廳逾10年嘅營運商早前不再續約，由另一集團接手營運，立法會主席梁君彥、立法會秘書長陳維安、維他奶主席羅友禮尋日為新餐廳正式開業剪綵，梁話終於唔使再「搵食艱難」，大家可以去餐廳「歎杯茶」，但就希望餐廳唔會變「蛇竇」喇。
梁致詞話新餐廳為咗大家，喺不足3個月內完成裝修工程，食物多元，而且設立議員專用區添。佢又多謝評審委員會成員付出寶貴時間擔任試食。另外，佢提醒各位議員去餐廳「歎杯茶」嘅時候，千祈唔好將地方變成「蛇竇」。即唔好忘記職務，喺餐廳蛇王呀！
爭代表切燒豬 張宇人「被寸」
羅就話立法會對餐廳營運要求嚴謹，對食品質素同味道有研究，未來4年務求交出滿意成績。而喺切燒豬環節，早前掀起「扮代表」風波嘅評審委員會主席、飲食界議員張宇人就搞笑話，切燒豬一定要業界代表出手。不過，在場有人就反問張宇人，係咪飲食界「真代表」咁喇。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
