政情：陳恒鑌荃葵視察 街巷仍污糟邋遢

陳恒鑌目睹商店雲集嘅葵芳社區會堂一帶，有檔販於行人路中心堆積發泡膠箱、菜籃、紙箱，甚至堆疊大量雜物嘅手推車。鑑於手推車屬個人財產，處理方面較為複雜。面對呢個問題，陳認為政府應加派人手，精準打擊，並希望政府盡快喺雜物堆積嘅黑點，增設可收集雜物嘅大型箱或車輛，便利商戶妥善棄置雜物，以免影響市容。

至於荃灣河背街、川龍街、二陂坊等地嘅後巷，都有環境衞生問題，包括日久失修嘅唐樓污水渠，令不少家居污水或穢物於後巷積聚，更是播疫重災區；同時亦有污水渠錯駁到清水渠嘅現象，造成荃灣西海旁陣陣臭味；而唐樓外露嘅渠管就成為老鼠竄入民居嘅通道。佢認為相關政府部門需破除只負責處理政府土地嘅守舊思維，問題至有望解決；再者，荃灣舊區排水能力不足，政府部門只進行通渠，無助徹底處理，建議當局考慮擴闊排水系統。

佢又話荃灣舊區多間食肆營業至深夜，部分涉違規擴展營業範圍，加上大多售賣酒精飲品，造成噪音、食物殘渣、垃圾亂棄問題，更經常出現暴力案件，需要政府加強監管。

另一方面，政府計劃明年推出垃圾徵費，但計劃好有可能造成逃避收費嘅市民胡亂棄置垃圾。陳恒鑌提到，荃灣區唔少舊樓天台，亦曾因居民不當棄置垃圾，淪為非法垃圾場。而荃灣發展促進會就喺部分舊樓天台安裝「天眼」，防止有人不當棄置垃圾，而錄影片段更曾經用於舉報盜竊案，未來若引入人工智能技術，將更有利於監察及舉報非法棄置。而閉路電視更連繫太陽能裝置，可為舊樓梯間照明系統供應電力添。