政情：香港仔街市翻新將完工 下年初啟用

有份出席嘅議員鄧家彪形容香港仔街市活化工程係「單位大咗、通道闊咗」，街市亦高度結合環保元素，包括設有發泡膠冷壓機、環保回收便利點，以及避免鼠患嘅豬殼收發室，話對街市現代化拭目以待。佢又指，街市日後管理權會由外判公司跟進，至於租約仍由食環署負責批出。提到其他街市嘅翻新工程，鄧認為要刻不容緩，因為整靚咗個場，都會提升市民購物意欲。佢仲笑言疫情高峰期都會成日去街市買餸，但依家就少啲喇！

議員郭偉强就形容街市係自己個BB，而個BB就嚟出世。事關上屆立法會佢係港島區議員，期間推動商戶聯署加冷氣，確有親生骨肉嘅感覺咁話。而未來檔位大咗，全街市都有冷氣，食肆又有成170個位，一定旺丁旺財。不過只可惜舖大咗租貴咗，郭話難再有以往老婆婆一人經營嘅臘肉臘腸小店啦。

另外，建築、測量、都市規劃及園境界議員謝偉銓亦滿意工程進度，指街市融合環保元素，又建議冷氣設立智能元素，按人流多寡自動調節，惟相關太陽能環保元素因欠缺地方而未能實行。