政情：載荷專家招募今開始 創科局長疑搞錯日子

雖然「載荷專家」呢個名詞，港人可能非常陌生，但一講到航天員或太空人，就大家都明白。內地日前宣布展開第4批預備航天員選拔工作，而名額就係12至14名預備航天員，當中包括航天駕駛員、航天飛行工程師、同埋有機會上太空做實驗嘅載荷專家。而港澳地區人士就首次可參與載荷專家嘅選拔。儘管脫穎而出嘅港澳參加者仲要同內地人士競逐，但畢竟港人首次有機會衝出大氣層，可謂意義重大。

而之前問過政府點樣畀香港市民參加載人航天工程嘅議員梁熙，就十分關注港人報名嘅進度，尋日佢一見到孫東就把握機會，詢問有關「載荷專家」嘅招募情況。事後佢引述孫東嘅說話，指尋日係第一日接受報名，然而尋日朝早須出席立法會前廳交流會，所以未能掌握相關消息，但就期望香港能佔一席位咁話。之不過，招募期係由本月6日至27日，即係話尋日都未開始，究竟實情係議員錯誤引述，定係局長記錯咗呢？由於交流會係閉門進行，咁就真係得佢哋先至知真相啦。

除咗講航天工程之外，梁熙話佢都有同政府建議，爭取港人參與內地組織嘅極地或深海探險，以及考古探索。佢話相信香港好多青年都對呢方面嘅工作有濃厚興趣咁話。