政情：太熱冇登高 黃錦星睇相當散步

出咗名慳電、同埋習慣唔開冷氣嘅黃錦星，尋日都喺社交平台貼文，慨嘆氣候變化引致極端天氣，即使往年每逢重九都會登高，之不過尋日實在太熱，無謂冒住中暑嘅風險貿然上山。雖然登山嘅行程告吹，但佢都念念不忘香港嘅郊野，指近年喺多方嘅支持下，包括新界東北印洲塘海岸公園一帶嘅荔枝窩、梅子林等偏僻隱世古村其鄉郊復育正在萌芽。

佢又上載，早前喺印洲塘海岸公園街渡上，回望荔枝窩、梅子林、蛤塘等古村一帶嘅重重群山相片，呼籲大家日常衣食住行，力爭2050年前實現碳中和嘅目標喎，之不過香港能否如佢所願，低碳轉型，咁就真係講唔埋啦。